Сэтинньи 24 күнүгэр тыйаатыр эдэр артыыстара икки оскуолаҕа ыалдьыттаатылар. Ол курдук, Н.Н.Чусовской аатынан Антоновка орто оскуолатыгар буолбут көрсүһүү туһунан Анисья Колесова иһитиннэриитэ: «Биһиги үс буолан Н.Н.Чусовской аатын сүгэр Антоновка орто оскуолатыгар профориентационнай үлэ ыытан кэллибит. Щепкин аатынан училище быйылгы выпускниктара, эдэр кэллиэгэлэрбит Григорьев Евгений уонна Пономарева Алена бэйэлэрин үөрэммит кыһаларын сырдаппыттара, хайдах туттарсан киирбиттэрин, ханнык предеметтэргэ үөрэммиттэрин, кимнээх үөрэппиттэрин туһунан сиһилии кэпсээбиттэрэ. Оттон мин култуура уонна ускуустуба эйгэтигэр ханнык үөрэхтэр баалларын, хайдах туттарсыахха сөбүн туһунан билиһиннэрдим. Ону тэҥэ үөрэнээччилэр биэрбит ыйытыыларыгар хоруйдаан, театрга ханнык идэлэр баалларын, үөрэххэ киирэргэ туох ирдэнэрин туһунан кэпсээн бириэмэ биллибэккэ ааста.»
А.Н.Чусовской аатынан Ньурбатааҕы техническэй лицейгэ 2014 сыллаахха лицей администрациятын уонна Ньурба тыйаатырын уус-уран салайааччытын, СӨ ускуустубатын үтүөлээх диэйэтэлэ Юрий Макаров, тыйаатыр түмэлин салайааччыта, Саха Өрөспүүбүлүкэтин норуодунай артыыската Валентина Николаева көҕүлээһиннэринэн Ньурба тыйаатырыгар анаммыт Театральнай фойе арыллыбыта. Быйылгы үөрэх дьылыгар фойе миэстэтэ уларыйда, урукку матырыйааллара тыйаатыр түмэлигэр харайыллаллар.
Сэтинньи 24 күнүгэр Прокопьева Варвара Николаевна, Никифорова Туйаара Дмитриевна кылаас салайааччылардаах 10 “а”, 10 “б” кылаастар үөрэнээччилэрэ, төрөппүттэрэ Лицей тэриллибитэ отут сылын көрсө Тыйаатырга анаммыт стендэлэри оҥотторон Театральнай фойены арыйдылар. Үс стендэҕэ Тыйаатыр этикетэ, Пушкин каартатын туһунан билиһиннэрии уонна улахан стендэҕэ Ньурбаҕа тыйаатыр кэрэ эйгэтин туһунан хаартыскалардаах информация бааллар. Лицей учууталлара, үэлиһиттэрэ, үөрэнээччилэрэ уонна ыалдьыттара бу стендэҕэ баар матырыйааллары көрөн интэриэһиргиэхтэрэ, туһаныахтара, куар кодунан киирэн Ньурба тыйаатырын сонуннарын билсиэхтэрэ. Фойе арыллыытыгар лицей дириэктэрэ Тобонов Иван Гаврильевич эҕэрдэтин тиэртэ. Театральнай фойены саҥардары көҕүлээбит төрөппүт, Ньурба тыйаатырын тыйаатыр литературнай чааһын сэбиэдиссэйэ Семенова М.Е. лицей уонна Ньурба тыйаатыра бииргэ үлэлэһиилэрэ сылтан сыл аайы кэҥии турарыгар баҕа санаатын тиэртэ, лицей үөрэнээччилэрэ тыйаатыр испэктээктэригэр Пушкин каартатын туһанан сылдьалларыгар ыҥырда. Тыйаатыр эдэр артыыстара, быйыл Щепкин аатынан училище алтыс саха устуудьуйатын бүтэрбит выпускниктар Александра Михайлова уонна Ефрем Татаринов тыйаатыр кэлэктиибин аатыттан эҕэрдэлээн Анемподист Иванович Софронов-Алампа “Төрөөбүт дойду” хоһоонун аахтылар.
Бу курдук, тыйаатыр артыыстара оскуолаларга сылдьан үөрэнээччилэри кытта көрсүһэллэрэ, куруһуоктары ыыталлара оҕо дьоҕурун, талаанын сайыннарыыга, үүнэр көлүөнэни тыйаатыр эйгэтигэр сыһыарыыга көмөлөһөр.
