Сэтинньи 22 күнүгэр «66 устуудьуйа» кыра саалатыгар саха чулуу уола П.А. Ойуунускай төрөөбүтэ 130 сылыгар анаан ыытыллыбыт Литературнай саломмутугар Хатыы нэһилиэгин Николай Прокопьев аатынан орто оскуолатыттан саха тылын учуутала Ирина Ивановна Васильева салайааччылаах сэттис, ахсыс, онус кылаастар үөрэнээччилэрэ ыалдьыттаатылар. Ыраах сытар нэһилиэктэн анаан-минээн айаннаан кэлэн саҥа тыйаатыры, артыыстар толорууларын көрбүт-истибит оҕолор санааларын сэргээн ааҕыҥ!
Арсентий Ефремов, 8 кылаас: «Мин, Н.И.Прокопьев аатынан Хатыы орто оскуолатын үөрэнээччитэ Ефремов Арсентий, сэтинньи 22 күнүгэр П.А.Ойуунускай төрөөбүтэ 130 сылыгар аналлаах литературнай салоҥҥа Ньурба драматическай театрыгар ыҥырыллан ыалдьыттаатым. Театр музейын билиһиннэрдэ Мария Егоровна, музейга кыайыы кынаттаах кэлбит наҕараадалара үчүгэйиэн. Киһи киэн туттара элбэх эбит. Театр улахан уонна кыра саалатын көрөн сөхтүбүт. Ол кэнниттэн литературнай саломмут саҕаланна. Бииртэн биир көстүү тахсан истэ. Сорох ааҕыылартан күллүбүт аҕай. П.А.Ойуунускай айымньыларын артыыстарбыт бэрткэ да табан аахтылар, инсценировкалаан көрдөрдүлэр. Мин сөбүлээн көрдүм, наһаа астынным.»
Вова Михеев, 10 кылаас: «П.А.Ойуунускай 130 ааһыгар аналлаах литературнай салоҥҥа Ньурба театрыгар ыалдьыттаатым. Театры кэрийэн кэрэтин сөҕө көрдүбүт. Үлэлээн ааспыт артыыстар хаартыскаларын, үлэлии сылдьар артыыстар оонньоон кыайыыны аҕалбыт наҕараадаларын киһи киэн тутта көрөр. Тэрээһин кыра саалаҕа буолла. Бииртэн биир интэриэһинэйи көрөн үөрдүбүт даҕаны. Улуу суруйааччыбыт айымньыларын тыыннаах көстүүгэ таһаардахтарына ааҕардааҕар ураты көстүү буолар эбит. Мин саамай сөбүлээн, талааныгар сүгүрүйбүт артыыһым Борис Борисов буолла. Айымньы ис хоһоонун көрөөччүгэ наһаа итэҕэтиилээхтик тиэрдэр, көрдөрөр. Кылгас да кэмҥэ артыыстардыын алтыһан П.А.Ойуунускай айымньыларын чиҥэтэн билсибиппиттэн наһаа үөрдүм.Ньурбам театра сайда тур!»
Миша Семенов, 10 кылаас: «Мин бэҕэһээ 5 чаас айаннаан Ньурба драматическай театрыгар ыалдьыттаатым. Онно биһигини тыйаатыр үлэһиттэрэ наһаа үчүгэйдик, минньигэс алаадьы сандалылаах көрсүбүттэрэ. Театр туһунан Семенова М.Е. кэпсээбитэ, экскурсия оҥорбута. Театр кэрэ көстүүтүн, музейга баар ситиһии наҕараадатын сөҕө көрбүппүт. Үчүгэй да талааннаах артыыстар үлэлээн ааспыттарынан, үлэлии сылдьалларынан киэн туттубуппут. Литературнай салон кыра саалаҕа П.А.Ойуунускай олоҕуттан саҕаламмыта. Ол кэнниттэн айымньыларынан таҥыллыбыт бииртэн-биир көстүүлэрэ тыыннаах буолан көрдөрүллүбүттэрэ. П.А.Ойуунускай хоһооно ырыа буолан ылламмытын сэргээтим. Айымньыларыгар баар уобарастары бэрткэ да биһиэхэ, көрөөччүгэ, тиэртилэр. Бииртэн биир талааннаах артыыһы көрөн артыыс буолуох санаа кэллэ. Маннык кэрэни көрдөрбүт учууталбытыгар Ирина Ивановнаҕа барҕа махтал! Театр артыыстара биһиэхэ П.А.Ойуунускай айымньытын тыыннааҕымсытан көрдөрбүттэригэр уонна наһаа истиҥник көрсүбүттэригэр махталбыт муҥура суох. Баҕарыам этэ артыыстарбар, доруобуйаны, бар дьоҥҥутун үөрдэ сылдьаргытыгар, ситиһиилэр кэлэ туралларыгар.»
Кюннэй Семянова, 10 кылаас: «Мин санаабар, театр кэрэ көстүүтэ хас биирдии үөрэнээччини үөртэ. Истиҥ көрсүһүү кэнниттэн П.А.Ойуунускай айымньыларын оонньоон көрдөрбүттэрэ миигин олус үөртэ.Артыыстарбыт билигин буола турарын курдук оонньуулларын наһаа биһирээтим. Махтал.»
Нюргуяна Винокурова, 8 кылаас: «Театр саҥа дьиэтэ үлэлээбитэ биир сыла ааһан Ньурба дьонун үөрдүбүт. Театрга сэргии көрбүтүм түмэлэ. Онно ситиһиинэн кэлбит наҕараадалара үгүс. Элбэх үлэттэн кэлбит ситиһии буолуо дии санаатым. Олус интэриэһиргээбитим “Капсула времени”. Ол капсула аһылларыгар 2066 сылга театрга сылдьыах санаа кэллэ… Литературнай саломмут П.А.Ойуунускай төрөөбүтүттэн саҕаланна. Талааннаах артыыстар Ойуунускай айымньытын оонньоон көрдөрбүттэрин наһаа кэрэхсээтим. Саха Өрөспүүбүлүкэтин үтүөлээх артыыската Александра Кривогорниицына “Мөккүөр” айымньыны аахпытыгар онно баар көтөрдөр харахпар көстөн кэллилэр. Наһаа да үчүгэйдик ааҕар.
Мин кини курдук ааҕыахпын баҕардым. Өссө Саха Өрөспүүбүлүкэтин норуодунай артыыһа Борис Иванович Борисов “Олох дуу, түүл дуу” айымньыны ааҕарыгар кэпсээн иһигэр тэҥҥэ сылдьыспыт курдук сананным. Түүлгэ баар оҕонньору наһаа аһынным. Көрөөччүнү итэҕэтэрдии оонньуур артыыстар элбэхтэрин көрөн сөхтүм.
Чахчы да бары талааннаахтарыан! Бу күнү биһиэхэ бэлэхтээбит артыыстарбытыгар махтал буоллун. Көрөөччүлэргит эһигинэн киэн туттабыт.»
Кэрэчээнэ Иванова, 8 кылаас: «Биһиги сэтинньи 22 күнүгэр Ньурба тыйаатырын ыҥырыытынан П.А.Ойуунускай 130 сааһыгар аналлаах тэрээһини көрөн кэллибит. Хатыы орто оскуолатын оҕолоро бу тэрээһиҥҥэ иккис ыалдьыт буоларбытынан киэн тутуннубут. Биһиги Ирина Ивановна салайааччылаах 13 оҕо буолан уһуннук айаннаан, “Хаһан тиийэбитий?”- диэн ыйыт да ыйыт буолан тиийбиппит. Театрга биһигини бэрт эйэҕэстик көрсүбүттэрэ, Семенова М.Е. театрга экскурсия оҥорбута. Бэрт интэриэһинэй тэрээһиҥҥэ сылдьан тахсыбыппыттан наһаа үөрэбин.»
Сайнаара Санникова, 7 кылаас: «Айаннаан иһэммин театр интэриэһинэйэ суоҕа буолуо дии санаабытым. Дьиэбэр төннөрбөр санаам уларыйбыта. Театр диэннэрэ чахчы да интэриэһинэйин, үчүгэйин билбиппиттэн мин наһаа үөрдүм. Биһиги, уон үс оҕо уонна учууталбыт Ирина Ивановна буолан Ньурба театра П.А.Ойуунускай төрөөбүтэ 130 сылыгар аналлаах тэрээһиҥҥэ сырыттыбыт. Мария Егоровна биһигини көрсөн театрга экскурсия оҥордо. Кыра саалаҕа артыыстарбыт П.А.Ойуунускай айымньытын аахтахтарын ахсын талааннарыттан, ааҕар саҥаларыттан, туттан-хаптан мимиканан көрөөччүгэ тиэрдэллэрин көрө сөхтүм уонна биһирээтим. Саамай сөҕө көрбүт айымньыларбынан Саха Өрөспүүбүлүкэтин норуодунай артыыһа Борис Борисов ааҕыытыгар “Олох дуу,түүл дуу?” уонна Саха Өрөспүүбүлүкэтин үтүөлээх артыыската Александра Кривогорницына толоруутугар “Мөккүөр” буоллулар. Бу тэрээһини ыыппыт Мария Егоровна Семеноваҕа махталбын тиэрдэбин.»
Таня Николаева, 7 кылаас: «Театрга барарбын бастаан сөбүлээбэтэҕим. Айаным саҕаламмыта. Баран иһэн таах барбыт курдук санаммытым. Театрга тиийэн баран кэлбиппиттэн наһаа үөрдүм уонна астынным. Артыыстар талааннарын сыаналаатым. Көрбүппүттэн олох күүскэ «Мөккүөр» айымньыны сөбүлээтим. Хас биирдии көтөр саҥатын, туттарын-хаптарын оруобуна да үтүктэр. Киһи истэ олоруох курдук. Талааннаах да артыыстар баалларыттан киэн тутуннум. Театрга инники санаабыт өйдөбүлүм сүттэ. Театр диэн наһаа да үчүгэй эбит. Махтал туох баар кэрэни бэлэхтээбит артыыстарбытыгар.»
Мичийэ Васильева, 7 кылаас: «Ньурба театырыгар литературнай салоҥҥа ыалдьыттаан кэлэн баран, бэйэм санаабын суруйарга холоннум. Театр тас көрүҥүттэн саҕалаан, ис өттүн саҥа көрөр киһи барытын сэргии көрдүм. Кыра саалаҕа олорон Мария Семенова П.А.Ойуунускай 130 сааһыгар ыыппыт литературнай салонугар ыалдьыт быһыытынан сырыттым. П.А.Ойуунускай айымньыларын артыыстар ааҕалларын көрөн астынным. Александра Кривогорницына араас көтөр саҥатын, тутталларын-хапталларын үтүктэн аахпытын сэргээтим. “Таатта үрэх үрдүгэр” ырыаны толорбут артыыстар хас да куолаһынан арахсаллара эчи, үчүгэйиин. Биһиги Ньурбабыт театрыгар талааннаах да артыыстар баалларыттан үөрдүм, киэн тутуннум. Махтал Мария Егоровнаҕа, оскуолабыт суоппарыгар Алексей Григорьевичка, учууталбытыгар Ирина Ивановнаҕа.»
Чээнэ Васильева, 7 кылаас: «Театрга бастакы сырыым. Айаннаан иһэн театры сөбүлүүрүм дуу, суоҕа дуу диэн санаалаах этим. Театырбыт тас өттө эчи үчүгэйиин, бастаан харахпар театр үрдүк дьиэтэ уонна хачыала быраҕылынна. Тас кэрэ көстүүтүттэн ис өттүгэр киирдим. Онно өссө кэрэлэр бааллар: 200-н тахса миэстэлээх улахан саала уонна аҕыйах киһи батар кыра саалата, түмэлэ, артыыстар хосторо. Биһиэхэ маны барытын М.Е. Семенова көрдөрдө уонна кэпсээтэ. П.А.Ойуунускай олоҕун, айымньыларын кэпсээн литературнай салону саҕалаата. Ойуунускайбыт айымньыларын артыыстарбыт аахтахтарын ахсын сэргээн истим. Аахпыт айымньыбын Александра Кривогорницина толорбутугар манна баар кыыллар харахпар көстөн кэллилэр. Наһаа да үчүгэйдик ааҕаллар артыыстарбыт барахсаттар. Киһи бэйэтэ ааҕара уонна театрга көрөрө уратылаах эбит. Театр артыыстара талааннарын көрдөрбүттэригэр мин махтанабын. Көрөөччүлэргит махталын ыла туруҥ.»
Ньурба тыйаатырын бары дьонун аатыттан Хатыы орто оскуолатын саха тылын уонна литературатын учууталыгар И.И. Васильеваҕа, оҕолорго уонна суоппар Алексей Григорьевичка махтанабыт!
