Олунньу 11 күнүгэр Ньурба тыйаатырын айар бөлөҕө Төрөөбүт тыл, сурук-бичик күнүн көрсө Хорула нэһилиэгэр ыалдьыттаата.
2021 сылга үлэҕэ киирбит «Кэскил» култуура киинигэр артыыстар саха литэрэтиирэтин классига Николай Неустроев “Тиэтэйбит” кэмиэдьийэтинэн СӨ култууратын туйгуна Алгыс Макаров туруорбут «ТИЭТЭЙБИТ«(12+) испэктээгин көрдөрдүлэр.
Литэрэтиирэҕэ чааһын сэбиэдиссэйэ Мария Семенова тыйаатыр үлэтин билиһиннэрдэ, Ньурба тыйаатырын уонна Хорула нэһилиэгин бииргэ ситимнээбит киһинэн ийэ олоҥхоһут Василий Иванович Иванов-Чиллэ Баһылай буоларын бэлиэтээтэ. 2012 с. Чиллэ Баһылай 2000 сыллаахха айбыт «Күннүк сиртэн көстөр көҕөччөр аттаах Күн Күбээдьэ бухатыыр» олоҥхотунан испэктээги СӨ уск. үт. диэйэтэлэ Юрий Макаров туруоран ол сыл балаҕан ыйыгар Уфа (Башкортостан) куоракка ыытыллыбыт норуоттар икки ардыларынааҕы түүрк тыллаах тыйаатырдар 5-с «Туганлык» бэстибээллэригэр кыттыбыттарын аҕынна.
Хорула нэһилиэгин олохтоохторо испэктээги олус сэргээн көрдүлэр, нэһилиэк оскуолатын педагог-психолога Иванов В.В.: “Ньурба тыйаатырын испэктээгин астына көрдүбүт. Артыыстар бары чахчы дууһаларын биэрэн туран оонньоотулар, көрөөччүлэр ытыспыт хабыллыар диэри таһынныбыт. Оскуолаҕа бииргэ үөрэммит табаарыһым Николай Филиппов уола Петя былырыын эмиэ кэлэн кыттыбыта, бу испэктээккэ Хаҕынай Сэмэн оруолун итэҕэтиилэхтик толордо. Ньурба тыйаатырыгар махтанабыт, ситиһиилэри баҕарабыт, Хорулаҕа кэлэргитин күүтэбит.”
«Кэскил» култуура киинин дириэктэринэн Ньурба тыйаатырыгар 2008-2010 сылларга музыка операторынан үлэлии сылдьыбыт Сергей Федоров үлэлиир: «Ньурба тыйаатырыгар үлэлээбит кэммин олус күндүтүк саныыбын. “Ньырбакаан” испэктээк турбута, “Уот Дьулустаан” сөргүтүллүбүтэ, “Халлаан дьайҕара халлыах тустаах” испэктээгинэн гостуруолга сылдьыбыппыт. Хорулаҕа кэлэн үлэлээбитим уон иккис сыла туолар. Ааспыт сылга нэһилиэкпит 125 сылын бэлиэтээбиппит, үгүс тэрээһиннэри ыыппыппыт. Култуурабыт киинигэр былааммыт элбэх. Киинэ устар былааннаахпыт. Ньурба тыйаатырын «Тиэтэйбит» туруоруутун сөбүлээтим, биһиэхэ куруук сылдьар буолуҥ. Үлэлии сылдьыбыт кэлэктииппэр саҥа испэктээктэри туруоран үрдүктэн үрдүк ситиһиилэри дабайаргытыгар баҕарабын.»
Саха литэрэтиирэтин классига Николай Неустроев аатырбыт кэмиэдьийэтинэн туруорууну, көрөөччү сөбүлээн көрөр “Тиэтэйбит” испэктээгин илдьэ Ньурба тыйаатырын айар бөлөҕө гостуруолга аны саас айанныыра былааннанар.
