Ахсынньы 3 күнүттэн Ньурба тыйаатырын 12  киһилээх (салайааччы СӨ култууратын туйгуна Прокопий Федоров) айар бөлөҕө ыаллыы сытар Сунтаар улууһун нэһилиэктэринэн гостуруолга сылдьар. Артыыстар Сиэйэҕэ, Түбэйгэ, Кутанаҕа, Күүкэйгэ, Элгээйигэ тыйаатыр сүрүн режиссера, СӨ култууратын туйгуна Алгыс Макаров туруорбут “Кутурук күрэҕэ”, “Тиэтэйбит” испэктээктэри көрдөрдүлэр. Бүгүн айар бөлөх Хороҕо тиийдэ., салгыы Күндэйэҕэ, Туойдаахха, Сунтаарга дьон сөбүлээн көрөр туруорууларынан ыалдьыттыахтара. 

     Күүкэйдээҕи «Сарыада» култуура киинин “В контакте” сирэйигэр https://vk.com/saryada_k Ньурба тыйаатырын айар бөлөҕө ыалдьыттаабытын туһунан ааҕыҥ: “Ахсынньы ый 6 күнүгэр, Ньурбатааҕы судаарыстыбаннай көһө сылдьар драматическай тыйаатыр, Сунтаар улууһугар гастролларын чэрчитинэн, Күүкэй нэһилиэгэр ыалдьыттаан аастылар. Оҕолорго саха остуоруйаларын матыыбынан, «Кутурук күрэҕэ» спектакль (туруорааччы-режиссер — Алгыс Макаров) 16:00 чаастан саҕаламмыта. Төһө да халлаан тымныытын иһин, кырачаан көрөөччүлэрбит саалаҕа тоҕуоруһа мустан, күлэн-үөрэн, оонньоон -көрүлээн тарҕастылар.

        Киэһэ 19:00 чаастан, Николай Неустроев «Тиэтэйбит» спектакла көһүннэ. Саалаҕа көрөөччү мустан, спектакль бириэмэтигэр саҕаланан, күлүү-үөрүү, ытыс тыаһа аргыстаах түмүктэннэ.

        Тыйаатыр артыыстарыгар, Күүкэй нэһилиэгин олохтоохторуттан, улахан махталбытын тиэрдэбит уонна кэнэҕискитигэр да, саҥа туруоруулаах кэлэн, тыйаатыр сырдык эйгэтигэр сыһыара тураргытыгар баҕарабыт!

        Сарыада КК үлэһиттэрин аатыттан, күндү көрөөччүлэрбитигэр, тэрээһиҥҥэ бириэмэтигэр мустаргытыгар улахан махталбытын тиэрдэбит!»

       Ньурба тыйаатырын кэлэктиибин аатыттан Сунтаар нэһилиэктэрин култуура кииннэрин үлэһиттэригэр истиҥ көрсүһүүгүт, сылаас аскыт иһин махтанабыт оттон айаҥҥа сылдьар кэллиэгэлэрбитигэр   гостуруолу ситиһиилээхтик түмүктүүргүтүгэр баҕарабыт!