Тохсунньу 30 күнүгэр СӨ култууратын туйгуна Прокопий Федоров салайааччылаах Ньурба тыйаатырын айар бөлөҕүн  Арассыыйаҕа Педагог уонна аҕа сүбэһит, Саха сиригэр Үлэ сылларыгар анаммыт Үөһээ Бүлүү нэһилиэктэринэн гостуруола саҕаланна.

Айар бөлөх  бастакынан ыраах Боотулуу нэһилиэгэр ыалдьыттаата, кырачаан көрөөччүлэр саха норуотун остуоруйаларын матыыбынан СӨ култууратын туйгуна Алгыс Макаров туруорбут «Кутурук күрэҕэ» остуоруйатын  сөбүлээтилэр. Николай Неустроев кэмиэдьийэтинэн «Тиэтэйбит» (12+) испэктээк  тыйаатыры сэҥээрэр нэһилиэк олохтоохторун киэһэлэрин сэргэхситтэ.

        Айар бөлөх кыттааччылара Ньурба тыйаатырыгар үлэлии сылдьыбыт Саха Өрөспүүбүлүкэтин үтүөлээх артыыската Ольга Григорьева уонна СӨ култууратын туйгуна Николай Тихонов   сырдык ааттарыгар сүгүрүйэн,       Боотулууга баар мемориальнай билиитэ таһыгар хаартыскаҕа түстүлэр.

     Айар бөлөх Маҥаас, Далыр,Мэйик, Оҥхой, Кырыкый,Дүллүкү,Хоро, Кэнтик нэһилиэктэринэн сылдьан   олунньу 8 күнүгэр Үөһээ Бүлүүгэ гостуруолун түмүктүөҕэ.