Саха литэрэтиирэтин классига Николай Неустроев “Тиэтэйбит” кэмиэдьийэтин 1925 сыллаахха суруйуоҕуттан, күн бүгүҥҥэ диэри саха дьоно биир таптыыр айымньыта буолар. СӨ култууратын туйгуна Алгыс Макаров туруорбут «ТИЭТЭЙБИТ»(12+) кэмиэдьийэтин көрдөрө Ньурбатааҕы судаарыстыбаннай көһө сылдьар драматическай тыйаатыр айар бөлөҕө (салайааччы СӨ култууратын туйгуна Прокопий Федоров) бу күннэргэ Ньурба оройуонун нэһилиэктэригэр сылдьар. Бүгүн айар бөлөх Дьиикимдэ нэһилиэгэр айаннаата. Сарсын испэктээги Ньурбачаан олохтоохторо көрүөхтэрэ.
Тохсунньу 23 күнүгэр Хаҥалас нэһилиэгин олохтоохторо, театр кэрэ эйгэтигэр кыттыһан, элбэх киһи кэлэн испэктээги астына көрдө сэҥээрдэ, күлэн үйэтин уһатта. Бу туһунан библиотекарь Мария Николаева суруйбут: «Испэктээккэ Ньурба театрын киэн туттуулара буолбут, СӨ үтүөлээх артыыстара Майя Слепцова, Венера Никитинаны кытта, бары да талааннаах эдэр артыыстар оонньоон көрдөрбүттэрэ. Ньурбабыт театра кэскиллээҕин көрөөччү инникитин өссө да элбэҕи эрэнэ кэтэһэрин туоһутунан буолла. Эдэр артыыстар Омуннаах Уйбаан сүрүн оруолун толорбут артыыс Роман Семенов, Хаахынай Сэмэн оруолугар Петр Филиппов, кыра уол Олег Конощук, Сардана Михайлова, Ася Колесова толорууларын көрөөччү чугастык ылынна. Ону сэргэ бу испэктээккэ, кэмиэдьийэ жанрын кыайа тутан оонньообут уруккуттан да сөбүлээн көрөр артыыстарбыт — СӨ култууратын туйгуннара Прокопий Федоров, Олег Конощук, Надежда Афанасьева, Артур Евсеев бу сыллар тухары Ньурба театры таптааччыларын сүгүрүйүүтүн элбэхтик ылан кэллэхтэрэ. Испэктээк уотун-күөһүн эдэр уолаттар А. Михайлов, В. Николаев кыайа туппуттар, артыыстары эрэллээх суоппардара Александр Николаев таста. Көрөөччүлэр испэктээк түмүк чааһын «браво», «бис» хаһыынан доҕуһуоллаан артыыстарга кэрэ түгэни бэлэхтээтилэр. «Тиэтэйбити» көрбүт нэһилиэк олохтоохторо, испэктээги биһирээбиттэрин куйаар ситимигэр ыытан үөрүүлэрин үллэстибиттэр, ол курдук нэһилиэк олохтооҕо Валентина Николаева: «Тиэтэйбити» куорат театрын испэктээгин уонна киинэтин көрүөхпүн баҕарар этим. Бэҕэһээ көрөммүн наһаа астынным, бэйэбит да артыыстарбыт оһуобай үчүгэйдик оонньууллар эбит», итини сэргэ Хаҥалас МТ дьаһалтатын баһылык солбуйааччытын дьиэ кэргэнинэн кэлэн көрбүт Семен Семенов: «Ньурбатааҕы судаарыстыбаннай көһө сылдьар драматическай тыйаатыр Н. Неустроев «Тиэтэйбит» кэмиэдьийэтин туруорбуттарын көрөн-истэн, олус сэҥээрэн кэллибит. Артыыстар бэркэ да оонньууллар, оруолларыгар киирэллэрэ киһини сөхтөрөр», — диэн суруйбуттара элбэҕи этэр. Театр бу ураты эйгэ, манна көрөөччү музыка дьүрүскэн тыаһыгар уйдаран үөрэн күлүөн, хомойон ытыан да сөп. Толкуйдуохха уонна дьиктиттэн соһуйуохха эмиэ сөп. Билигин олох сыаннастара, сайдыы тэтимэ түргэнник уларыйа турар кэмигэр, эдэр көрөөччү искусство бу саамай уһулуччулаах эйгэтин — тыйаатыры таптыы, умсугуйа көрөллөрүгэр баҕа санаабын тиэрдэн туран, саха театрын төлкөтүн түстэспит улуу Алампа тылларынан түмүктүүбүн: «Театр — киһи үчүгэй санаатын уһугуннарар, сайыннарар оскуола».
Ньурба тыйаатырын кэлэктиибин аатыттан нэһилиэктэрбит олохтоохторугар, күндү көрөөччүлэрбитигэр истиҥ көрсүһүүлэрин, сайаҕас санааларын иһин махтанабыт.
Арассыыйаҕа Педагог уонна аҕа сүбэһит, Саха сиригэр Үлэ сылларыгар анаммыт гостуруолга айар бөлөх тохсунньу 30 күнүттэн олунньу 8 күнүгэр диэри Үөһээ Бүлүү улууһун нэһилиэктэринэн сылдьыаҕа. Кырачаан көрөөччүлэргэ саха норуотун остуоруйаларын матыыптарынан Алгыс Макаров туруорбут «Кутурук күрэҕэ» (0+) остуоруйаны оттон улахан дьоҥҥо Николай Неустроев кэмиэдьийэтинэн «Тиэтэйбит» (12+) испэктээги көрдөрүөхтэрэ. Ньурба тыйаатырын саҥа дьиэтигэр өрөспүүбүлүкэбит тыйаатырдарын гастролларын Саха тыйаатыра саҕалаабыта, тохсунньу 26 күнүгэр Суорун Омоллоон аатынан Опера уонна балет тыйаатыра ыалдьыттыыр, олунньу 3 күнүгэр Олоҥхо, олунньу 10 күнүгэр Үүнэр көлүөнэ тыйаатырдара кэлэллэрэ күүтүллэр.
