Сэтинньи 19 күнүгэр Ньурба тыйаатырыгар Вина Дельмар айымньытынан СӨ култууратын туйгуна Алгыс Макаров туруорбут «Дьоллоох да этибит…» испэктээк көрдөрүлүннэ. Туйаара Львова сценографията уонна көстүүмнэрэ. Тылбааһын Люси Купер сүрүн оруолун толорор Саха Өрөспүүбүлүкэтин норуодунай артыыската Валентина Николаева оҥорбута. Оттон Саха Өрөспүүбүлүкэтин норуодунай артыыһа Борис Борисов Люси кэргэнин, Купердар аҕаларын Барк оруолун толорор. Үйэ аҥара бииргэ олус иллээхтик олорбут Люсины уонна Баркы биэс оҕолоруттан хайалара даҕаны көрүөн-истиэн баҕарбат, онон ийэлээх аҕа тус-туспа олороллоругар күһэллэллэр.
Көрөөччүлэр санааларын интернет ситимин нөҥүө ыыталлар: “Сылдьан кэллим , наһаа үчүгэй, киһи элбэх. Браво!», «Сөбүлээн, хараҕым уута барыта таҕыста..», «Астык спектакль, дириҥ ис хоһоонноох, ытыы-ытыы көрдүбүт», «Бэккэ оонньуур эбиттэр, таҥастара, бижутериялара, мебель иҥин олох үчүгэй».
Давыдов Егор — педагогическай үлэ бэтэрээнэ: «Саҥа тыйаатыр аһыллыаҕыттан бүгүн үһүс сырыым. Көрбүт испэктээкпин олус сөбүлээтим, улахан проблеманы көрдөрдө, үйэ аҥара бииргэ олорбут дьоллоох ыаллар олохторун чахчытын барытын көрдөрдүлэр, биэс оҕолоро бары араас дьон буола улааппыттар. Ньурба тыйаатыра аһылларыгар “Тиэриллибит кырыс” испэктээктэн саҕалаан батыһа сылдьан көрөр этибит. Эдэркээн артыыстар кэлбиттэрэ. Чаҕылхайдык оонньообут артыыстартан билигин соҕотох Валентина Николаева баар. Нагульнов оруолугар Фрументий Сафроновы өйдүүбүн. Иккис испэктээктэрэ «Таптал уонна уодаһын” диэн өйдүүбүн. Оччолорго тыйаатыр саҥа үлэтин саҕалаабыт буолан Ньурба тыйаатырыгар испэктээктэргэ олус элбэх киһи сылдьара, билиэт былдьаһык буолара. Тыйаатыр кэлэктиибин саҥа, киэҥ-куоҥ, сырдык дьиэҕэ киирбиттэринэн эҕэрдэлиибин! Өссө да өр сылларга айымньылаах үлэни баҕарабын.»
Филиппов Айтал: «Ньурбатааҕы Степан Васильев аатынан многопрофильнай гимназия 9 “а” кылааһын үөрэнээччилэрэ Пушкин картатын туһанан испэктээги көрдүбүт, кылааспыт салайааччытыгар Григорьева Туйара Викторовнаҕа махтанабыт. Артыыстар олус үчүгэйдик оонньоотулар, бары астынныбыт, саҥа тыйаатыр наһаа кырасыабай, барыта саҥа, эргэ тыйаатырга эмиэ сылдьар этибит. Инникитин өссө кэлиэхпит. Бу көрбүт испэктээкпит толкуйдатар, төрөппүттэрбитин убаастыахтаахпыт, таптыахтаахпыт,улаатан баран көрүөхтээхпит.»
Федоров Егор: «Дьокуускайтан төрөөбүт Ньурбабар уоппускам кэмигэр кэлэ сылдьабын. Ньурбабыт олус тупсубут,мин кэлбэтэҕим үс сыл буолла, ол иһигэр элбэх саҥа тутуу баар буолбутун, суол тупсубутун көрөн олус үөрдүм, өссө паркабытын көрөр санаалаахпын. Түбэһэн олус үчүгэй испэктээккэ сырыттым, хомолтолоох даҕаны, үөрүүлээх да түгэннэр бааллар. Арҕаа дойду ыалын олоҕо көстөр, толкуйдара олох атын дии санаатым. Сахаларга маннык көстүү аҕыйах дии саныыбын, саха дьоно төрөппүт дьоннорун көрөллөр-истэллэр, биирдэ эмит төрөппүттэрин көрбөт түгэннэрэ баар буолар, ол эрээри, арҕаа дойдулар курдук буолан иһэрбитинэн, эмиэ даҕаны уларыйыы барыан сөп буоллаҕа.»
Яковлев Ярослав: «Ньурбатааҕы многофункциональнай гимназияҕа үөрэнэбин. Испэктээк үчүгэй, артыыстар оонньууларын эмиэ сөбүлээтим. Үөрдүм даҕаны, хомойон да ыллым. Кырдьаҕас дьоруойдары аһынным, сөбүлээтим, оҕолоругар кыыһыра санаатым. »
Прокопьева Анастасия: «»Дьоллоох да этибит…» диэн спектакльга ийэбинээн сырыттыбыт. Саала иһэ тобус толорута киһини үөрдэр. Икки аҥаар час устата биир тыынынан көрдүбүт, дуоһуйа астынныбыт, сынньанныбыт. Киһи тылынан кыайан кэпсээбэт иэйиитин бэлэхтээбиккитигэр, дууһабытын таарыйбыккытыгар артыыстарга уонна туруорааччы режиссерга махталбыт муҥура суох. Көрөөччүлэр үгүспүт ытастыбыт, долгуйан көрбүппүтүн ытыспыт тохтообот тыаһа бигэргэттэ. Чуолаан, 50 сыл да кэнниттэн тапталларын кыыма умуллубатах паара арахсар бүтэһик сценатын харах уута суох көрбөккүн. Валентина Пантелеймоновна уонна Борис Иванович курдук улуу, талааннаах артыыстардаахпытынан киэн туттабыт. Өссө эбиитин кинилэри кытары хаартыскаҕа түһэммит дьиэбитигэр дьоллоох да дьоннор бардыбыт. Историческай фото буоллаҕа.Артыыстарга уонна туруорааччы режиссёрга баҕарабын куруук толору сааланы, өссө да элбэх оонньуулары, толору дьолу.»

Ийэ сылыгар турбут дириҥ ис хоһоонноох испэктээк Арассыыйа ийэлэрин күнүгэр сэтинньи 27 –гэр бары ийэлэргэ анаан киэһэ алта чаастан көстүөҕэ. Күндү көрөөччүлэрбитин күүтэбит!