Ол курдук, кырачаан көрөөччүлэр саха норуотун остуоруйаларын матыыбынан СӨ култууратын туйгуна Алгыс Макаров туруорбут «Кутурук күрэҕэ» остуоруйатын көрдүлэр. Бу остуоруйа аан бастаан былырыын кулун тутар ыйга көрөөччү дьүүлүгэр тахсыбыта. Худуоһунньук -Камилла Михайлова, СӨ култууратын туйгуна Мария Семенова инсценировката. Ойуур кыылларын доҕордоһууларын, хайаларын кутуруга үчүгэйин быһаарар күрэх туһунан остуоруйаҕа оруоллары СӨ култууратын туйгуннара Олег Конощук, Лена Яковлева, эдэр артыыстар Анисья Колесова, Петр Филиппов толордулар. Сэтинньи 18 күнүгэр Н.Н.Чусовской аатынан Антоновка орто оскуолатын алын кылаастарын үөрэнээччилэрэ учууталларын кытта кэлэн көрдүлэр. Испэктээк иннинэ эдэр көрөөччүлэргэ анаан СӨ үтүөлээх артыыстара Александра Кривогорницына, Людмила Васильева, СӨ култууратын туйгуна Мария Семенова, эдэр артыыскалар Валерия Протодьяконова, Мария Дегтярева, Сайыына Герасимова тыйаатыр иһигэр экскурсия оҥордулар. Бүгүн остуоруйаны С.Васильев аатынан Ньурба 1-гы №-дээх, Убайаан орто, Ньурбатааҕы 3-с №-дээх оскуолаларын үөрэнээччилэрэ уонна төрөппүттэрин кытта кэлбит көрөөччүлэр көрөн астынан бардылар. Антоновка оскуолатын үөрэнээччилэрэ Иванов Дариан, Степанов Коля, Степанов Саша (үһүс “б” кылаас): «Бүгүн саҥа тыйаатыры бастакытын көрдүбүт, иһэ да, таһа да кырасыабай эбит. Эргэ тыйаатырга эмиэ сылдьыбыппыт, күрэххэ кыттыбыппыт, онно тэҥнээтэххэ киэҥ, улахан, саалата наһаа үчүгэй. Киэһэ уота умайдаҕына олус үчүгэй дииллэр, дьоммутун кытта кэлэн көрүөхпүт дии саныыбыт. Остуоруйаттан Куобаҕы, Бөрөнү ордук сөбүлээтибит. Тыйаатырга өссө да атын остуоруйалары көрө кэлиэхпит.» Егоров Айтал (иккис кылаас): «Бүгүн кылааһынан кэлэн остуоруйаны көрдүбүт, бары сөбүлээтибит. Кэлин Колобок, Эриэппэ, Кубалар, Дьэгэ-Бааба туһунан остуоруйалары көрүөхпүн баҕарабын. Эдьиийим театральнай кружокка дьарыктанар, остуоруйаны бүгүн эмиэ кылааһынан кэлэн көрдө.» Ньурба тыйаатырыгар сотору кэминэн о5олорго аналлаах испэктээк премьерата буолара күүтүллэр. Режиссер Маргарита Васильева эбээн кыысчаанын Кындыкаан туһунан Лидия Тарасова суруйбут остуоруйатынан испэктээги ахсынньы ыйга Саҥа сылы көрсөр бырааһынньык иннинэ таһаарарга үлэтин саҕалаата.
