Бэҕэһээ, Судаарыстыбаннас күнүгэр, СӨ култууратын туйгуна Прокопий Федоров салайар Ньурба тыйаатырын айар бөлөҕүн кыттааччылара М.К.Аммосов аатынан ХИФУ Сүрүн үөрэнэр корпуһун төрдүс этээһигэр Анжелина Ильина айымньытынан СӨ култууратын туйгуна Алгыс — Сиэн Мөрөс туруорбут «ҺӨҔҮҤ» испэктээгин оонньоотулар. Испэктээги ХИФУ РФ Хотугулуу-Илиҥҥи норуоттарын тылларын уонна култуураларын институтун уһуйааччылара, устудьуоннара көрөн олус сэргээтилэр, санааларын тиэртилэр.
Тыл үөрэҕин хандьыдаата, дассыан, ХИФУ Хотугулуу-илиҥҥи норуоттарын тылларын уонна култуураларын үнүстүүтүн дириэктэрэ Торотоев Гаврил Григорьевич: «Олус дириҥ суолталаах кыһалҕаны эһиги инники күөҥҥэ таһаардыгыт.Манныгы өссө көрө илик этибит. Эһиги туруорбут кыһалҕаҕыт быһаччы алпаабыкка, бэлиэлэрбитигэр сыһыаннаах.Бу туруоруу суолтата, уратыта итиннэ сытар. Тылы харыстыахха диибит, култуураны сайыннарыахха диибит, ол гынан баран дьүһүлгэн нөҥүө дьоммутугар-сэргэбитигэр хаһан да көрдөрбөтөх эбиппит. Субу курдук дьүһүлгэн нөҥүө ыччат дьоҥҥо тиийиэмтиэ ньыманы туһаммыккыт. Хас биирдии буукубабыт, дорҕооммут дьүһүлгэҥҥэ кубулуйбут. Билим эйгэтин үлэһиттэрэ саха алпаабытын чочуйуоҕуҥ диэн куруук этэбит, тоҕо диэтэххэ, алпаабыппыт булкаас, 40 бэлиэттэн 13 -һэ нуучча бэлиэлэрэ буолаллар. Туруорууга Ү уонна Ө таптаһаннар биир бүтүн буола сатыыллар. Биһиги алпаабыппытыгар ҮӨ,ЫА,ИЭ, УО уонна уһун аһаҕас дорҕооннор суохтар. Олус улахан кыһалҕаны, тирээн турар тыын кыһалҕабытын тиийимтиэтик, уус-ураннык тиэртигит. Улахан махтал буоллун.»
Прокопий Федоров: “Бэҕэһээ биһиги айар бөлөхпүтүгэр, тыйаатырга олус дириҥ суолталаах күн ааста. Ол курдук Судаарыстыбаннас күнүгэр Сахабыт сирин ыччата үөрэнэр, киэн туттар университеппытыгар испэктээги көрдөрдүбүт. Сарсыарда эдэр артыыстарбыт сахабыт телевидениетын «Саҥа күн» биэриитигэр кыттыбыттара, испэктээк кэнниттэн режиссербут Алгыс Макаров, суоппарбыт Александр Николаев грамоталарынан наҕараадаланнылар уонна саха тылын ыччаппытыгар үөрэтэр убаастыыр дьоммут испэктээкпит туһунан санааларын тиэрдибиттэрэ олус долгутуулаах буолла. ”
СӨ норуодунай артыыһа Борисов Борис: «Тыйаатыр модун күүһүнэн норуоппут тирээн турар кыһалҕатын дьоҥҥо быһа тиэрдии холобурун көрдөрдө ааптар Анжелина Ильина, режиссёр Алгыс Макаров уонна артыыстар. Тыгыалас тымыры таарыйыы холобура баар.»
Сахабыт тылын тула мустуоҕуҥ, төрүт дорҕоону өрө тутуоҕуҥ!
