Ньурбатааҕы судаарыстыбаннай көһө сылдьар драматическай тыйаатыр кэлэктиибэ Саха сирин олохтоохторун Саха Өрөспүүбүлүкэтин Судаарыстыбыннаһын күнүнэн эҕэрдэлиир.
Бу үөрүүлээх күн Саха НКИХ сарсыардааҥы «Саҥа күн» биэриитигэр тыйаатыр эдэр артыыстара, М.С.Щепкин аатынан алтыс саха устуудьуйатын выпускниктара, бу күннэргэ Дьокуускай куоракка гостуруоллуу сылдьар айар бөлөхтөн Александра Михайлова, Ефрем Татаринов, Евгений Григорьев кытыннылар. Эдэр артыыстар тыйаатыр билиҥҥи үлэтин-хамнаһын, көрдөрө сылдьар «ҺӨҔҮҤ» испэктээк ис хоһоонун, толорор оруолларын уонна испэктээк көтөҕөр сүрүн кыһалҕатын-күннээҕи олоххо төрүт дорҕооннорбутун туттуу туһунан кэпсээтилэр. Бүгүн бу испэктээги айар бөлөх М.К.Аммосов аатынан ХИФУ устудьуоннарыгар анаан ГУК төрдүс этээһигэр күнүс 14 чаастан оттон сарсын Үүнэр куөлүөнэ тыйаатырыгар киэһэ 18 ч. 30 мүн. көрдөрүөхтэрэ.
