Тохсунньу 31 күнүгэр Ньурба тыйаатырыгар оройуон оскуолаларыгар үлэлиир тыйаатыр кэлэктииптэрин ыккардыгар ыытыллар «МҮЧҮК» көрүү күрэҕэ иккис төгүлүн ыытылынна.

Бу Ньурбатааҕы үһүс нүөмэрдээх оскуола Үөрэҕирии салаатын, «Кыталык» КД уонна Ньурба тыйаатырын кытта бииргэ ыытар күрэхтэрэ быйыл Аҕа дойду Улуу сэриитигэр Кыайыы 80 сылыгар ананна. Күрэх аһыллыытыгар Ньурба оройуонун үөрэҕирии управлениетын салайааччытын солбуйааччыта Сергей Васильев,

СӨ норуодунай артыыһа Борис Борисов,

Ньурба тыйаатырын эдэр артыыһа Никита Григорьев

кыттааччыларга эҕэрдэ тылларын анаатылар, ситиһиилэри баҕардылар. Дьүүллүүр сүбэҕэ Ньурба оройуонун үөрэҕин управлениетын иитэр уонна эбии үөрэхтээһин салаатын сүрүннүүр специалиһа Семенов В.Н., АГИКИ устудьуона Григорьева С.В., төрөппүттэр Ноговицын В.П., Столярова М.Н., Арассыйытааҕы оҕо уонна ыччат бастыҥнар хамсааһыннарын муниципальнай координатора Ефремова Ж.И., Ньурба тыйаатырыттан СӨ култууратын туйгуннара Анисимов Л.А., Семенова М.Е. үлэлээтилэр.

Барыта 15 оскуолаттан 239 үөрэнээччи кыттыылаах күрэххэ кытыннылар:
Бастакы бөлөххө:
- С.С.Потапов аатынан Убайаан орто оскуолата – Анна Неустроева “Тиргэһиттэр”(сал. Иванова Т.С., Егорова Р.П.)
- Ньурбатааҕы 3-с №-дээх алын сүһүөх оскуолатын «Мүчүк» тыйаатыр кэлэктиибэ – Уйбаан Бахсылыырап “Умнар бырааппыт суох” (сал. Семенов Р.А., Михайлова С.И., Герасимова С.Е.)
- В.И.Максимов аатынан Малдьаҕар орто оскуолатын «Сырдык сүүрээн» тыйаатыр кэлэктиибэ – Ольга Ушканова «Күн сырдыга» Малдьаҕар нэһилиэгэр буолбут дьиҥнээх олохтон дьүһүйүүтэ (сал. Слепцова Л.С.)
- М.С.Иванов-Багдарыын Сүлбэ аатынан Ньурбачаан орто оскуолатын «Бэтиэхэчээн» тыйаатыр кэлэктиибэ – И.А.Дмитриев –Сиэн Чолбодук “Ытыс бурдук” (сал.Николаева З.З.)
- С.С.Сүүлүскэй аатынан Сүлэ орто оскуолата – Иван Гоголев «Саллаат сүрэҕэ» (сал. Николаева З.С., Иванова О.С.)

Иккис бөлөххө:
- П.С.Егоров аатынан Акана орто оскуолата – Прокопий Николаев «Сэрии кэмин оҕолоро» (сал. Соркомова А.П.)
- «Ньурба эрэлэ» оҕо хамсааһына – Дьип Захаров «Ол күн» (сал. Захаров Д.П.)
- 41 үөрэнээччини кытыннарбыт М.С.Егоров аатынан Ньурба 2-с №-дээх орто оскуолатын «Кыымчааннар» тыйаатыра – Дмитрий Пономарев – Дьолуолаах «Биһик» (сал. Тимофеева А.А.)
- К.Д.Уткин аатынан Марха орто оскуолата – Анатолий Иванов «Оонньоммотох оҕо саас» (сал. Иванов А.Г.)
- Элбэх кыттааччылаах Н.Н.Чусовской аатынан Антоновка орто оскуолатын “Айуу,чэ” тыйаатыр устуудьуйата – Д.Бубякин “Герой Советского Союза майор Чусовской” кинигэтин матыыбынан “Ньурба ньургун уола” (сал. Матвеева Н.В.)
- М.В.Мегежекскэй аатынан Маалыкай орто оскуолата – Александр Фадеев «Эдэр гвардия» (сал. Николаева М.А.)
- Алексеев С.П.-Боһуут аатынан Чаппанда орто оскуолата – А.С.Захаров-Хоҥкуй Өлөксөй туһунан «Ытык аҕа» (сал.Павлова С.А.)
- Маар орто оскуолата – Саргылана Федорова «Журавлиный крик» документальнай дьүһүйүүтэ (сал. Федорова С.П., Габышев Е., Семенова С., Васильев К.В., Егорова Н.Н.)
- А.Н.Чусовской аатынан Ньурбатааҕы техническэй лицей – Николай Антонов «Почта таһааччы» (сал. Михайлов Нь.В.)
- Е.К.Федоров аатынан Хорула орто оскуолата «Көрсүһүү» музыкальнай дьүһүйүү (сал. Тобонова А.В.)

Дьүүллүүр сүбэ түмүгү таһаарар кэмигэр көрөөччүлэр, кыттааччылар Ньурба тыйаатырын «АРТик» студиятын иитиллээччилэрин толоруутугар Егор Афанасьев уочаркатынан Маргарита Васильева-Хотууна туруорбут “Сэрии тулаайаҕа” испэктээгиттэн быҺа тардыыны көрдүлэр. (салайааччылар СӨ култууратын туйгуна Вера Лазарева, Маргарита Васильева)


Саҥа талааннары арыйбыт көрүү күрэх түмүгэ маннык буолла:
1-4 кылаас оҕолоругар
1 миэстэ — Ньурба 3 №-дээх алын сүҺүөх оскуолатын «Мүчүк» театральнай кэлэктиибэ
2 миэстэ — Ньурбачаан орто оскуолатын «Бэтиэхэчээн» тыйаатыр кэлэктиибэ
3 миэстэ- Малдьаҕар орто оскуолатын «Сырдык сүүрээн» тыйаатыр кэлэктиибэ

5- 10 кылаас оҕолоругар:
1 миэстэ — Антоновка орто оскуолатын “Айуу –чэ!” тыйаатыр устуудьуйата
2 миэстэ — «Ньурба Эрэлэ» оҕо хамсааһынын актыбыыстара
3 миэстэ — М.С.Егоров аатынан 2-с №-дээх оскуола “Кыымчааннар” тыйаатыр устуудьуйата

Анал ааттары уонна анал бириистэри ыллылар:
«Бастыҥ дьахтар оруола» — Алексеева Николина, «Ньурба Эрэлэ» оҕо хамсааһынын иитиллээччитэ, «Ол күн» айымньыга Сардаана оруолун иһин

«Бастыҥ эр киһи оруола» — Мирослав Николаев, Антоновка орто оскуолатын 7 кылааҺын үөрэнээччитэ Николай Чусовской оруолун иһин

«Бастыҥ режиссер үлэтэ» — Маар орто оскуолата, Федорова Саргылана Петровна «Журавлиный крик» туруоруутун иһин

«Бастыҥ музыканан киэргэтии» — Хорула орто оскуолата «Көрсүһүү» музыкальнай дьүһүйүүтүн иһин

Ньурба тыйаатырын анал бириистэрин — олунньу 13 күнүгэр буолуохтаах «ҺӨҔҮҤ» испэктээккэ ыҥырыыны Чаппанда оскуолатын үөрэнээччилэрэ уонна кулун тутар 28 күнүгэр остуоруйа премьератыгар ыҥырыыны Убайаан орто оскуолатын оҕолоро ыллылар.
Оттон «ГРАН-ПРИ» сүрүн бирииһин — көһө сылдьар кубогы уонна 5 тыҺыынчалаах сертификаты Николаева Маргарита Анатольевна салайааччылаах М.В.Мегежекскэй аатынан Маалыкай орто оскуолатын «Кустук» тыйаатыр кыттааччылара Александр Фадеев айымньытынан «Эдэр гвардия» туруорууларын иһин туттулар.

Ньурба тыйаатырын литэрэтиирэ-драматургия хайысхатын салайааччыта Мария Семенова: ««Мүчүк» күрэх сүрүн тэрийээччитэ Ньурба үһүс нүөмэрдээх алын сүһүөх оскуолата буолар. Ньурба тыйаатыра сыл аайы тэрийэр үлэҕэ көмөлөһөр, анал бириис туруорар уонна дьүүллүүр сүбэҕэ кыттыһар. 2015 сылтан тэриллэр «Мүчүк» күрэх сайдан, кэҥээн, ааспыт сылтан тыйаатырга ыытыллар буолбута оҕолорбут сайдалларыгар, тыйаатыр ускуустубатыгар өссө чугаһыылларыгар көмөлөһөр. Быйылгы күрэххэ кыттааччылар бары баннер-афиша оҥотторон аҕалбыттара олус үчүгэй, бары да буолбатар, тыйаатыр испэктээгин программкатын олус үчүгэйдик оҥорор буолбуттар. Бары кэлэктииптэр кыһаллан бэлэмнэммиттэр, салайааччылар быйылгы бэлиэ сылбытыгар анаан талбыт айымньылара да оҕолорго сөптөөхтөр. Малдьаҕар, Антоновка, Чаппанда оскуолаларын үөрэнээччилэрэ бэйэлэрин нэһилиэктэрин дьонун олохторуттан көрдөрбүттэрэ олус долгутуулаах буолла. Маар орто оскуолатын үөрэнээччилэрэ Ильмень күөлгэ сылдьан Аҕа дойду сэриитигэр кыттыбыт саллааттар кырамталарын көрдөөһүҥҥэ кыттыбыттарын туһунан дьүһүйүү көрдөрбүттэрэ. Хорулалар музыкальнай дьүһүйүүлэрэ эмиэ биир интэриэһинэй туруоруу. Марха оҕолоро төрөөбүт тылларынан иҥнибэккэ саҥараллара көһүннэ.

Ньурбатааҕы иккис нүөмэрдээх уонна Антоновка оскуолалара элбэх үөрэнээччилэрин кытыннардылар. Матвеева Нюргуяна салайааччылаах «Айуу,чэ» устуудьуйа биир дойдулаахтарыгар Сэбиэскэй Сойуус дьоруойугар Николай Чусовскойга анаабыт туруоруулара ураты көстүү буолла. Маалыкай оскуолатын үөрэнээччилэрэ “Эдэр гвардия” айымньыттан күүстээх, көрөөччүнү долгутар толоруулара дьүүллүүр сүбэ быһаарыытынан Гран-при сүрүн бирииһин кыайыылааҕынан ааттанна. Онон, олус интэриэһинэй, дириҥ суолталаах күрэх ааста.
Антоновка оскуолатын, Ньурба лицейин саха тылын учууталлара Кононова С., Мясоедова А. үөрэнээччилэрин кытта, элбэх төрөппүттэр кэлэн көрбүттэрэ үөрдэр. Маар орто оскуолатын «Юла» медиакиин оҕолоро быйылгы күрэҕи олус үчүгэйдик сырдаттылар. Ньурба куорат сорох оскуолаларыгар тыйаатыр артыыстара үлэлэһэр буоллулар, тыйаатыр иһигэр аһыллыбыт «АРТик» устуудьуйаҕа араас оскуолаттан оҕолор дьарыктаналлар, инникитин үүнэр көлүөнэни кытта үлэбит өссө кэҥииригэр баҕарабын. Үгүс оскуолаларга, ордук нэһилиэктэргэ учууталлар бэйэлэрэ тыйаатыр куруһуоктарын салайан айымньылаахтык үлэлииллэр.
Быйылгы күрэххэ СӨ норуодунай артыыската Валентина Николаева «Грим»,

СӨ култ. туйгуна Роман Семенов «Артыыс маастарыстыбата»,

СӨ үт. арт. Майя Слепцова «Артыыс идэтин уратыта»,

постановочнай чаас сэбиэдиссэйэ Валерий Стручков «Бутафория оҥоруута» маастар-кылаастары ыыттылар.

Бары кыттыбыт кэлэктииптэр Кыайыы 80 сылыгар анаабыт туруорууларын бэйэлэрин нэһилиэктэригэр, оскуолаларыгар көрдөрөллөрүгэр баҕарабын уонна өрөспүүбүлүкэ иһигэр буолар күрэхтэргэ көхтөөхтүк кыттыҥ диэн ыҥырабын.»

СӨ үтүөлээх артыыската Майя Слепцова: “Маастар-кылаас ыытарбар сүрүннээн артыыс идэтэ туох уратылааҕын кэпсээтим. Оҕолортон күрэх сүрүн соругун, бэйэлэрин оруолларын төһө билэллэрин ыйыталастым, сорох оҕолор толорор оруолларын ааттарын билбэттэр эбит, ол иһин испэктээк атмосферата диэн тугун, хайдах онно бэлэмнэнии барыахтааҕын өйдөттүм, сэрии кэминээҕи олоҕу өйдүүргэ кинигэтэ ааҕыҥ, урукку кэми кырдьаҕастартан ыйытан билэ сатааҥ, режиссеру истиэхтээххит, утарыласпакка пластилин курдук буолуҥ диэн эдэр артыыстарга сүбэлиибин. Оҕолорбутун бэйэбит кэннибититтэн ханна да сырыттаргыт хомуна сылдьыаҕыҥ диэн ыҥырабын. ”

СӨ култууратын туйгуна Леонид Анисимов: “Мин бастакы бөлөх туруорууларын көрөөһүҥҥэ дьүүллүүр сүбэҕэ кыттыстым. Кырачаан оҕолор, алын кылаастар сүрдээҕин бэлэмнэммиттэрэ көстөр. Бииртэн биир интэриэһинэй туруоруулары көрдүм. Оҕолор барахсаттар наһаа итэҕэтиилээхтик оонньууллар эбит, биирдиилээн олох чаҕылхай артыыс буолуох оҕолор бааллар эбит диэн бэлиэтии көрдүм. Аҕа Дойду сэриитин көрдөрөргө, бу тиэмэҕэ үлэлииргэ, кыра оҕоҕо оруолун арыйарга режиссерга, учууталга да олус чэпчэкитэ суоҕа биллэр. «Мүчүк» күрэх үгэс курдук сылын аайы ыытыллан өссө күүһүрэн, улаатан, сайдан истин.”

Ньурба тыйаатырын аатыттан тэрийээччилэргэ, эдэр артыыстарга, оҕолору бэлэмнээбит бары салайааччыларга, төрөппүттэргэ дириҥ махталбытын тиэрдэбит, тыйаатыры таптааҥ, испэктээктэргэ сылдьыҥ диэн ыҥырабыт!

А.Комогорцева хаартыскаҕа түһэриилэрэ