Балаҕан ыйын 17 күнүгэр Ф.Г.Сафронов аатынан Ньурбатааҕы Киин бибилэтиэкэҕэ Алексеева Прасковья Прокопьевна-Мутукча айымньыларын-хомоҕой хоһооннорун, кэрэ кэпсээннэрин хомуйан, ийэлэрин кэриэстээн оҕолоро таһааттарбыт «Кылыһым кылыгар уйдаран…» кинигэ сүрэхтэниитэ буолан ааста. Тэрээһини бибилэтиэкэ үлэһитэ Маргарита Романовна Ноева иилээн-саҕалаан ыытта. Мутукча хоһооннорун дириҥ иэйиилээхтик ааҕан Ньурба тыйаатырын артыыската, СӨ үтүөлээх артыыһа Майя Слепцова мустубут дьону долгутта. Бу туһунан суруйааччы Ольга Софронова-СУҺУМ иһитиннэриитигэр суруйбут: «Мутукча хоһооннорун Ньурбабыт театрыттан бары таптыыр артыыскабыт Майя Слепцова дириҥ иэйиилээхтик аахпыта-айымньы дьиҥ суолтатын, аналын толору тириэртэ дии саныыбын. Артыыс ааҕыыта— чахчы олох ураты, ол курдук интонацията, куолаһын тембра уларыйыыта, ис кут айманыытын, долгуйуутун, үөрүүтүн-хомолтотун, Айымньы ис дьиҥин биэрэр дьикти дьоҕурдаах.»
Ньурбатааҕы бибилэтиэкэ хаартыскалара
