«АРТиК» айар устуудьуйа үлэтин саҕалаата

Ньурбатааҕы судаарыстыбаннай көһө сылдьар драматическай тыйаатыр иһинэн үлэлиир «АРТиК» айар устуудьуйа үлэтин саҕалаата. Манна Ньурба элбэх хайысхалаах гимназиятыгар, техническэй лицейгэ уонна М.С.Егоров аатынан 2-с №-дээх орто оскуолаҕа үөрэнэр 13 оҕо кастины ааһан киирбиттэрэ. Салайааччы – режиссер Маргарита Васильева-Хотууна, сүрүн дьарыктары СӨ култууратын туйгуннара Олег Конощук, Вера Лазарева, артыыстар Анисья Колесова, Никита Григорьев ыытыахтара, устуудьуйа үлэтигэр тыйаатыр бары артыыстара, үлэһиттэрэ кыттыахтара.

Балаҕан ыйын 17 күнүгэр студия иитиллээччилэрэ СӨ норуодунай артыыската Валентина Николаева салайар ттүмэлигэр тыйаатыр историятын билистилэр, саҥа тыйаатыр дьиэтин көрдүлэр.

Соторутааҕыта премьерата буолбут «Дьоһун олох оҥкуллара» испэктээккэ оонньообут артыыстары, СӨ култууратын туйгунун Артур Евсеевы, Щепкин аатынан училище выпускниктарын Евгений Григорьевы, Ефрем Татариновы кытта көрүстүлэр, испэктээк, артыыс үлэтин туһунан интэриэһиргиир ыйытыыларын биэрдилэр.