Сэтинньи 22 күнүгэр Ньурба тыйаатырыгар «Саха» НКИХ уһулбут «Уот Дьулустаан» историческай сериала XXIV бүтүн россиятааҕы «ТЭФИ Регион-2025» куонкуруска «Игровой фильм/сериал» анал ааты ылбытынан, иһирэх кэпсэтии түһүлгэтэ ыытылынна.
«:66-с устуудуьуйа» тыйаатыр кыра саалатыгар ыалдьыттарбытын сахалыы сиэринэн боҕуруоскай оту буруолатан, арчылаан, ыраастаан, арыылаах алаадьынан, чороонноох быырпаҕынан күндүлүү көрүстүбүт.
Н.И.Харитонов аатынан «Кыталык» култуура киинин «Талба талааннаахтар түһүлгэлэрэ» норуодунай фольклорнай кэлэктиип салайааччыта Алексей Михайлов кырыымпаҕа оонньоон тэрээһини олус киэргэттэ.
«Уот Дьулустаан» сериал быйыл сыл саҕаланыытыгар «Саха» НКИХ ханаалыгар көстөн үгүс көрөөччү сэҥээриитин ылбыта. Валентина Гаврильева айымньытын 1991 сыллаахха Ньурба тыйаатырын эдэр режиссера, билигин тыйаатыр уус-уран салайааччыта, СӨ ускуустубатын үтүөлээх диэйэтэлэ Юрий Макаров туруорбута.
Бу испэктээк 1992 с. Абакаҥҥа, Чебоксары куоракка буолбут «Федерация-92» фестиваль лауреатынан ааттаммыта. Испэктээккэ Сабыстай хотун оруолун толорбут СӨ норуодунай артыыската Валентина Николаева бииргэ оонньообут артыыстарын ахтан-санаан ааста.
Сериалга Сүөкүлэ оруолун чаҕылхайдык оонньообут СӨ үтүөлээх артыыһа Майя Слепцова, Сабыстай хотун оруолун толорбут СӨ култууратын туйгуна Сардаана Михайлова уобарастарынан тахсан көрөөччүлэри үөртүлэр, сериалга үлэлээбит үтүө кэмнэрин кэпсээтилэр. Аҥар Харах омсолоох оруолун Ньурба театрыгар режиссерунан үлэлээбит, СӨ култууратын туйгуна Алгыс Макаров,
Ылдьаана уобараһын толору арыйбыт Үүнэр көлүөнэ тыйаатырын артыыската Екатерина Семенова Дьокуускай куораттан,
Ньукууну толорбут Айтал Софронов Ытык-Күөлтэн,
Ньурба тыйаатырын артыыстара, СӨ култууратын туйгуна Дмитрий Слепцов,
эдэр артыыска Анисья Колесова
гостуруоллуу сылдьан видеоэҕэрдэлэрин ыыппыттара кэллиэгэлэригэр, көрөөччүлэргэ бэртээхэй бэлэх буолла. Сериал кэмигэр буолбут көрүдьүөс түгэннэртэн видеоролик улахан сэҥээриини ылла, сериалга оонньообут артыыстар көрөөччүлэр араас ыйытыыларыгар хоруйдаатылар. Артыыска Майя Слепцова ыаллыы олорор дьүөгэтэ Соловьева В.М. сериалы олус сөбүлээн көрбүтүн туһунан кэпсээтэ уонна Майя Петровнаҕа сибэкки дьөрбөтүн бэлэх уунна.
Тыйаатыр уус-уран салайааччыта Юрий Макаров көрөөччүлэри кытта кэпсэтиигэ санаатын тиэртэ: «1991 сыллаахха тугу туруорарбын билбэккэ сылдьан Валентина Гаврильева «Уот Дьулустаанын» аахпытым уонна тута бу айымньыны сценаҕа туруорар санаа киирбитэ. Уһун айаҥҥа тыын ылар курдук уонтан тахса сыл буолан баран «Акаары дьахтар» кэмиэдьийэ испэктээги таһаарбытым. Хайдах эрэ, хаайтарар кэмҥэ, Валентина Гаврильева айымньылара инникигэ эрэли, айыах-тутуох санааны киллэрбиттэрэ, ураты тыыны арыйбыттара. «Уот Дьулустаан» диэн икки тылга бэйэлэригэр ситиһиигэ тиэрдэр дириҥ суолта баар, ол курдук, Уот, Дьулус, Аан. Кэнники бириэмэҕэ саха норуотун култуурунай куодун, саха норуотун сайдыытын туһунан элбэхтэ толкуйдуубун. Эдэр артыыстарбыт режиссер быһыытынан үлэлэрин саҕалаан эрэллэр, Ньурба тыйаатырын инники репертуара сүрдээх интэриэһинэй буолуо диэн эрэнэбин. Көрөөччүлэрбитигэр анаан Театральнай кулууп диэн баара буоллар дии саныыбын.»
Юрий Алексеевич Ньурба тыйаатырыттан сериалга кыттыбыт Майя Слепцоваҕа, Сардаана Михайловаҕа эҕэрдэ суруктары туттарда.
Николай Неустроев «Тиэтэйбит» кэмиэдьийэтигэр Уйбаан сүрүн оруолун толорбут Роман Семенов көрөөччүлэргэ араас ыйытыылардаах оонньууну ыытан тэрээһин сахалыы оонньуулардаах иккис чааһын саҕалаата.
Таатта Чөркөөҕүттэн төрүттээх көрөөччүлэр Кириллина Елена Семеновна, Татаринова Дария Ивановна 1969 сылтан, оҕо эрдэхтэриттэн Ньурба тыйаатырын үстүү күннээх гостуруолларыгар көрдөрөр испэктээктэрин сөбүлээн көрөллөрүн кэпсээтилэр, сериал туһунан санааларын тиэртилэр.
Майя Слепцова, Чаҕылыына Сарыал, Сайыына Герасимова кырыымпа доҕуһуоллаах сахалыы ырыаларын бэлэхтээтилэр, тэрээһини артыыс Петр Филиппов оһуохайынан түмүктээтэ.
Бары кэлбит көрөөччүлэргэ тыйаатыр аатыттан махталбытын тиэрдэбит!
