Ньурба тыйаатырын айар суолугар бэйэтин кылаатын киллэрбит Саха Өрөспүүбүлүкэтин үтүөлээх артыыһа Егор Егорович Кириллин 1951 сыллаахха от ыйын 21 күнүгэр Мэҥэ-Хаҥалас улууһун Хочо нэһилиэгэр төрөөбүтэ. 1979 сыллаахха Хабаровскайдааҕы култуура уонна ускуустуба институтун “Норуодунай тыйаатыр режиссера” салаатын бүтэрбитэ. Үөрэҕин бүтэрээт биир сыл «Якуттеатрга» үлэлээбитэ. 1980 сылтан 2008 сыллаахха олохтон барыар диэри Ньурбатааҕы судаарыстыбаннай көһө сылдьар драматическай тыйаатырга бэриниилээхтик үлэлээбитэ.
М.Доҕордуурап «Аймалҕан» испэктээгэр маҥнайгы оруолун – Ньуолбардаах баһылык уобараһын ситиһиилээхтик арыйбыта. Үлэлээбитин тухары барыта алта уонча араас хабааннаах уобарастары толорбута, олор истэригэр: П.Тобуруокап “Алаас ырыата” -Тыҥкыылап, Ч.Ойдоб “Бэлэн Сэнгээ”-Жалбуу, И.Егоров “Хобороос” – Кыра Алеша, Далан “Хааннаах Илкээни”- Нэлэкэ Ойуун, Сиэн Чолбодук “Халлаан дьайҕара халлыах тустаах”-Суоратап, Н.Якутскай ”Араҥ уонна таптал” –Бэдьэкэ о.д.а. оруоллара көрөөччү биһирэбилин ылыан ылбыттара. И.Дмитриев-Сиэн Чолбодук «Тойукпун торумнааҥ, иһирэхпин истиҥ» испэктээгэр Анемподист Софронов уобараһын олус үчүгэйдик, иһирэхтик арыйбытын туһунан өрөспүүбүлүкэ бэчээтигэр сырдаппыттара. В.Протодьяконов «Манчаары» испэктээгэр режиссер ассистенын быһыытынан үлэлэспитэ оттон А.Кулаковскай «Преступник Манчаары» айымньытынан СӨ ускуустубатын үтүөлээх диэйэтэлэ Юрий Макаров туруорбут испэктээгэр Чоочо оруолун ылыннарыылаахтык толорбута.
Егор Егорович бастыҥ уопсастыбанньык этэ. Артыыстар ыккардыларыгар ыытыллыбыт уус-уран ааҕыы куонкурустарыгар элбэхтэ кыттан бириистээх миэстэлэри ылаттаабыта. Ньурба тыйаатырын туһунан матырыйааллары хомуйан саҕалаабыта уонна тыйаатыр түмэл-хоһун тэрийэн бастакы салайааччытынан буолбута. Үлэтин таһынан Ньурба улууһун «Ньурба» телестудиятын «Кэрчик» биэриитин ааптарынан, ыытааччытынан үлэлээбитэ. Егор Егорович «Майа-фильм» Манчаары Баһылай туһунан уһулбут киинэтигэр улуус баһылыгын оруолун толорбута. Артыыс тыйаатыр идэлээх сойууһугар хас да сыл үлэлэспитэ, тыйаатыр уус-уран сэбиэтин чилиэнэ этэ.
Артыыс Егор Егорович 1994 с. «Херсонесские игры» (Севастополь), «Золотой лев» (г.Львов) бэстибээллэргэ кыттыбыта. Өрөспүүбүлүкэ тыйаатырын ускуустубатыгар кылаатын иһин Егор Егорович «Саха Өрөспүүбүлүкэтин култууратын туйгуна» уонна «Саха Өрөспүүбүлүкэтин үтүөлээх артыыһа» бочуоттаах бэлиэлэринэн наҕараадаламмыта.
