Бүгүн, ыам ыйын 6 күнүгэр, Ньурба тыйаатырын артыыстара Ньурбатааҕы Варвара Андреевна Петрова аатынан кырдьаҕастар уонна инбэлииттэр  дьиэлэрин олохтоохторун Саха автономията төрүттэммитэ сүүс сылынан, Саас, үлэ бырааһынньыгынан уонна кэлэн иһэр Улуу Кыайыы 77 сылынан эҕэрдэлээн кэнсиэр көрдөрдүлэр.

Айар биригээдэ салайааччыта Дора Бурнашева:

«Ньурба тыйаатырын артыыстара үтүө үгэһин салҕаан сааскы бырааһынньыктарынан уонна Кыайыы күнүн көрсө Ньурбатааҕы интернатка олорор ытык кырдьаҕастары, инбэлииттэри  эҕэрдэлээтибит. Ыарыыттан харыстаан тэрилтэ дьиэтигэр киирбэккэ эрэ тас өттүгэр баар сквергэ эҕэрдэ нүөмэрдэрбитин көрдөрдүбүт. Кэнсиэри сэргээн көрбүт интернат олохтоохторо, тэрилтэ салайааччыта Семенова И.Ф. махталларын биллэрдилэр.»