Ньурба тыйаатырыгар быйыл Саха АССР 100 сылыгар анаан СӨ ускуустубатын үтүөлээх диэйэтэлэ Юрий Макаров сэбиэскэй судаарыстыбаннай  уонна партийнай үлэһит, Сибииргэ Сэбиэскэй былааһы олохтуур иһин охсуһуу кыттыылааҕа, Былатыан Ойуунускайдыын, Исидор Бараховтыын, 1922 сыл муус устарыгар Саха АССР тэрийсибит Максим Кирович Аммосов туһунан испэктээги туруоран көрөөччү дьүүлүгэр таһаарар былааннаах.

Бу испэктээк туруоруутугар бэлэмнэнии былырыыҥҥыттан саҕаламмыта. Ол курдук, Нам улууһугар Ньурба тыйаатырын үлэһиттэрэ былырыын тохсунньу 11 күнүгэр бара сылдьыбыттара.

Быйыл кулун тутар 21 күнүгэр тыйаатыр дириэктэрэ Юрий Алексеевич Макаров, сүрүн худуоһунньук Туйаара Львова, столяр Игорь Слепцов уонна суоппар Александр Николаев Дьокуускайга СӨ Национальнай библиотекатыгар Максим Аммосов төрөөбүтэ 125 сылыгар анаммыт  «Бессмертный наш Максим» онлайн-конференцияҕа сырыттылар.

Эбиэт кэнниттэн Ньурба тыйаатырын делегацията уонна Арктикатааҕы судаарыстыбаннай култуура уонна ускуустуба институтун актерскай  салаатын быйыл бүтэрэр үс устудьуон Нам улууһун Хатырык нэһилиэгэр сырыттылар. Улуус баһылыгын солбуйааччы Петр Абрамов, Хатырык нэһилиэгин баһылыгын солбуйааччы Артур Ноговицын, түмэл научнай үлэһитэ Станислав Дьяконов уонна олохтоохтор көрсөн М.К.Аммосов аатын сүгэр Судаарыстыбаннас түмэлигэр сырытыннардылар, нэһилиэк көхтөөх дьонун кытта төгүрүк остуол  тэрийдилэр.

Бу көрсүһүүгэ Юрий Алексеевич пьесаны П.Ойуунускай «Син биир буолбаат» диэн хоһоонугар олоҕуран туруоруон баҕарарын кэпсээтэ, Максим Аммосовы ханнык өрүтүнэн көрдөрөрүн олохтоохтордуун сүбэлэстэ. Төгүрүк остуолга кэлбит дьон бэйэлэрин санааларын атастастылар, баҕаларын эттилэр. Юрий Алексеевич аны сайын эмиэ кэлэр баҕалааҕын, чаҕылхай Максим туһунан пьеса  таҕыстаҕына маҥнайгынан Хатырыктар көрүөхтэрэ диэн санаатын тиэртэ.

Нам Хатырыгар көрсүһүү истиҥ иһирэх эйгэҕэ буолан ааста. Нам улууһун, нэһилиэк салалтатыгар, Хатырык дьонугар Ньурба тыйаатырын кэлэктиибин аатыттан махталбытын тиэрдэбит.