Бүгүн, кулун тутар 16 күнүгэр, саха литэрэтиирэтин төрүттээччи, бэйиэт, наука араас көрүҥнэригэр маҥнайгы оҥкулу оҥорбут чинчийээччи, гуманист-философ Алексей Елисеевич Кулаковскай -Өксөкүлээх Өлөксөй төрөөбүтэ 145 сылыгар өрөспүүбүлүкэ үрдүнэн ыытыллар Өксөкүлээх Өлөксөй күнүнэн Ньурба тыйаатырыгар «Өксөкүлээх Сардаҥата» тэрээһин ыытылынна. Ньурба тыйаатырыгар суруйааччы айымньыларынан СӨ ускуустубатын үтүөлээх диэйэтэлэ Юрий Макаров туруорбут “Преступник Манчаары” уонна “Сүүһүн туолбут эмээхсин ырыата” испэктээктэрэ көрөөччү биһирэбилин ылаллар.

Литэрэтиирэ чааһын сэбиэдиссэйэ Мария Семенова саха норуотун сүдү киһитин Өксөкүлээх Өлөксөй олоҕун, айар үлэтин сүрүн уратыларын билиһиннэрдэ.

СӨ үтүөлээх артыыһа Борис Борисов суруйааччы 1910 сыллаахха суруйбут «Ойуун түүлэ» поэматыттан быһа тардан аахта уонна: “Өксөкүлээх Өлөксөй саха норуота сүгүрүйэр, таптыыр улуу киһитэ буолар. Кини норуот өстөөҕүнэн ааттана сылдьыбыт кэмигэр биир киһи “Борокуот аал” айымньытын аахпытын иһин репрессиялаабыттар диэн истибитим.

Бэйиэт Ньукулай Чуор Ньурбаҕа Август Мураны кытта көрсүһүү тэрийбитигэр сылдьыбыттаахпын, ол саҕана Өксөкүлээх Өлөксөйү олус өрө туппат курдук этибит, Август Муран онно Өксөкүлээх айымньыларын нуучча тылыгар тылбаастаабыт суруйааччылар А.Е.Кулаковскайы улуу киһинэн ааҕалларын уонна кини бэйэтэ сүгүрүйэр киһитэ буоларын эппитэ. Савва Тарасов Өксөкүлээх Өлөксөйгө анаабыт олус үчүгэй табыллыбыт хоһоонноох, онно бэйэтин көрүүтүн суруйбут этэ.»- диэн эттэ.

“Сүүһүн туолбут эмээхсин ырыата” испэктээккэ сүрүн оруолу толорор СӨ үтүөлээх артыыската Майя Слепцова айымньыттан быһа тардан аахта.

Сүрүн режиссер, СӨ култууратын туйгуна Алгыс Макаров Өксөкүлээх Өлөксөй саатын туһунан истибит кэпсээнин иһитиннэрдэ.

СӨ үтүөлээх артыыһа Петр Винокуров: “Мин аҕам Винокуров Лазарь Петрович кэпсиир буолара, кини бэйэтэ 1912 сыл төрүөх, Өксөкүлээх Өлөксөй Өймөкөөҥҥө элбэхтэ сылдьар эбит, онно аҕам оҕо сылдьан көрөр эбит, орто уҥуохтаах, киппэ киһи этэ диирэ уонна биирдэ ыйыппытыгар Өксөкүлээх Өймөкөөн айылҕатын, салгынын хайҕаабытын эппит.”

Күндү тыйаатыры сэҥээрээччилэр, Майя Слепцова «Эбээ Маайа» Ютуб ханаалыгар Өксөкүлээх Өлөксөй айымньыларын ааҕыытын бу сигэлэринэн киирэн истиэххитин сөп.

https://youtu.be/S0re0j_5cfg

https://youtu.be/Zmgk98x2veU

https://youtu.be/9SoXtU_DS6Q

https://youtu.be/OYIeXQ0LKCs

https://youtu.be/VL6jWdZ7Ky8

https://youtu.be/E2KGYdUdN0U

https://youtu.be/8l_lKlthYPw

https://youtu.be/4ZYH4hJFN9E

https://youtu.be/V0m900paY14