Күндү Сахабыт Сирин олохтоохторун Олоҥхо күнүнэн эҕэрдэлиибит!

2005 сыл сэтинньи 25 күнэ биһиэхэ барыбытыгар дьоһун суолталаммыта – бу күн ЮНЕСКО Олоҥхону киһи аймах тылынан уонна өйүнэн айбыт култуурунай нэһилиэстибэтин үйэттэн үйэҕэ бэриллэр күндү баайа диэн аан дойду шедеврдэрин ахсааныгар киллэрбитэ. Бу улахан ситиһиини кэрэһилээн биһиги өрөспүүбүлүкэбитигэр Олоҥхо күнэ олохтоммута.

Ньурба тыйаатырыгар Олоҥхонон дьарыктанар артыыстардаахпытынан киэн туттабыт. СӨ култууратын туйгуна, СӨ Оһуохайын үтүөлээх этээччитэ Прокопий Федоров былырыын Олоҥхо күнүгэр Семен Григорьевич Алексеев – Уус Уола Уустарабыс «Дьэбириэлдьин Бэргэн» ( 6+) олоҥхотуттан быһа тардан толоруута Ютуб ханаалбытыгар көстүбүтэ, олоҥхону сэҥээрээччилэр үрдүк сыанабылларын ылбыта.

Күндү көрөөччүлэр, бүгүн Ньурба тыйаатырын Ютуб-ханаалыгар эдэр артыыс Петр Филиппов толоруутугар Георгий Слободчиков (Тэлээркэ Киргиэлэй) «Дьулуруйар Ньургун Боотур» олоҥхотуттан быһа тардан толорбутун көрөргүтүгэр ыҥырабыт!

Ньургун Михайлов устуута, таҥан оҥоруута. Күндү Саха сирин олохтоохторо! Өбүгэлэрбит кэс тылларын энчирэппэккэ, төрүт култуурабытын харыстаан, байытан, кэнэҕэс кэнчээригэ чөл тириэрдэрбитигэр төһүү күүс буолуоҕуҥ! Төрөөбүт дойдубут чэчириирин туһугар үүнэ-сайда туруоҕуҥ!