Алтынньы 26 күнүгэр Дмитриев И.А.-Сиэн Чолбодук төрөөбүтэ 90 сылыгар анаан СӨ үтүөлээх артыыһа Валентина Якимец туруорбут «Ньырбакаан» испэктээгин премьерата өрө көтөҕүллүүлээхтик буолан ааста.

Испэктээк худуоһунньугунан Туйаара Львова буолар, музыканан киэргэтиитин СӨ култууратын туйгуннара Леонид Иванов, Владимир Якимец оҥордулар, Ньурба тыйаатырын бары үлэһиттэрэ бу улахан испэктээк тахсарыгар түмсүүлээхтик үлэлээтилэр. Маассабай сыанаҕа тыйаатыр артыыстарын, үлэһиттэрин кытта тэҥҥэ Ньурбатаа5ы ускуустуба оскуолатын «Гулливер» оҕо тыйаатырын (сал.Степанова Л.Р.) уонна «Сардаана» фольклор кэлэктиибин (сал. Платонов В.Нь.) үөрэнээччилэрэ ис сүрэхтэриттэн кыһаллан кытыннылар.

Айар үлэтин 1979 сыллаахха Ньурба тыйаатырыттан саҕалаабыт Валентина Афанасьевна анал ыҥырыынан кэлэн Ньурбалар төрүппүт Ньырбакаан туһунан испэктээги Иннокентий Аксентьевич Дмитриев – Сиэн Чолбодук “Тойон ууһун утумнара” пьесатынан туруорда. Хоһоонунан үһүйээн пьесатын Сиэн Чолбодук 2008 сыллаахха суруйбута оттон бу пьесанан “Ньырбакаан” испэктээги Ньурба тыйаатырыгар бастаан СӨ ускуустубатын үтүөлээх диэйэтэлэ Юрий Макаров 2009 сыллаахха туруорбута, ол сыл кулун тутар ыйга ыытыллыбыт «Хаарыан хампа” бэстибээлгэ испэктээк “Бастыҥ режиссер үлэтэ” номинация кыайыылааҕынан ааттаммыта.

Саха Өрөспүүбүлүкэтин норуодунай артыыската Валентина Николаева толорбут Ньырбакаан уобараһа уһулуччу үрдүктүк сыаналанан, Ньурба оройуонун Мэҥэ бэлиэтэ буолбута.

Испэктээк бары эпидемиологическай миэрэни тутуһуллан көрдөрүлүннэ, QR-кодтарын көрдөрбүт дьон эрэ сырытта. Кэлбит көрөөччүлэр анал анкета толордулар. Көрөөччүлэр саҥа испэктээги ылыммыттарын, сөбүлээбиттэрин ытыстарын дохсун тыаһынан биллэрдилэр.

Ньурба оройуонун баһылыгын социальнай эйгэҕэ солбуйааччы Уларова А.М. режиссер Валентина Якимецка баһылык Иннокентьев А.М. аатыттан махтал суругу, сибэкки дьөрбөтүн туттарда, испэктээк туһунан тус санаатын тиэртэ. Тыйаатыр дириэктэрэ Макаров Ю.А. бары кыттааччылары уонна көрөөччүлэри эҕэрдэлээтэ, режиссер Валентина Якимецка кэлэктиип аатыттан махтал суругу туттарда.

Ньырбакаан уобараһын айан Мэҥэ бэлиэ аатын уонтан тахса сыл устата илдьэ сылдьыбыт СӨ норуодунай артыыһа Валентина Николаева иккис тыынын ылбыт испэктээккэ Ньырбакаан сүрүн оруолун толорбут эдэр артыыскаҕа Сардана Михайловаҕа, кыра Ньырбачааны оонньообут СӨ култууратын туйгунугар Вера Лазареваҕа бар дьон иннигэр уобарастарын салгыы үрдүк ситиһиилээхтик толоро, илдьэ сылдьалларыгар баҕарда.
Сиэн Чолбодук сиэн балта Николаева О.Д.: «Таайым Иннокентий Аксентьевич айымньытынан испэктээги кыыспын, уолбун кытта көрөн наһаа сөбүлээтибит,астынныбыт, артыыстар олус бэриниилээхтик оонньообуттарыттан долгуйдубут. Сахалар былыргы олохторун көрдөрөр испэктээк турбут,ыччаттар хайаан да көрөллөрө наадалаах. Режиссер Валентина Афанасьевнаҕа, Ньурба тыйаатырын кэлэктиибигэр уонна бары кыттыбыт, үлэлэспит дьоҥҥо барҕа махталбытын тиэрдэбит!»