Бэҕэһээ, алтынньы 26 күнүгэр, биир дойдулаахпыт, Саха тыйаатырын литэрэтиирэҕэ салаатын сэбиэдиссэйэ, суруйааччы, норуот тапталын ылбыт кэпсээнньит, драматург, тылбаасчыт, Саха Өрөспүүбүлүкэтин ускуустубатын үтүөлээх диэйэтэлэ Иннокентий Аксентьевич Дмитриев – Сиэн Чолбодук аатын уулуссаҕа биэрии үөрүүлээх түгэнэ буолла.

Атырдьах ыйын 20 к. ыытыллыбыт Ньурба куоратын депутаттарын сэбиэтин сессиятыгар Ньурба тыйаатырын этиитин ылынан, Иннокентий Аксентьевич Дмитриев – Сиэн Чолбодук аатын Ньурба куоратын Ыраах Убайаан “Новый” микрооройуонун уулуссатыгар биэрэргэ быһаарбыттара.

Бэлиэ тэрээһиҥҥэ Ньурба куорат администрациятын, “Кыталык” култуура киинин, Ньурба тыйаатырын үлэһиттэрэ, Сиэн Чолбодук биир дойдулаахтара, аймахтара кыттыннылар. Максим Федоров толоруутугар Сиэн Чолбодук 100 бастыҥ ырыа иһигэр киирбит «Ньургуьуннар» ырыатынан саҕаламмыт тэрээһиҥҥэ куорат баһылыгын солбуйааччы Мария Константиновна Куличкина, Ньурба куоратын сэбиэтин депутата, “Кыталык” култуура киинин дириэктэрэ Максим Викторович Рожин, Ньурба тыйаатырын дириэктэрэ, уус-уран салайааччыта Юрий Алексеевич Макаров, Ньурбачаан нэһилиэгин баһылыга Мария Николаевна Семенова, Сиэн Чолбодук сиэн балта Оксана Дмитриевна мустубут дьону эҕэрдэлээтилэр, санааларын тиэртилэр.

СӨ норуодунай артыыһа, Ньырбакаан уобараһын арылхайдык толорбут Валентина Николаева:

“2009 сыллаахха СӨ ускуустубатын үтүөлээх диэйэтэлэ Юрий Макаров Сиэн Чолбодук айымньытынан испэктээги туруорбута, онтон ыла Ньурба оройуонугар Ньырбакаан аата Мэҥэ бэлиэ быһыытынан биллибитэ”.

СӨ үтүөлээх артыыһа Валентина Якимец туруорбут испэктээгэр Ньырбакааны, кини уолаттарын толорор эдэр көлүөнэ артыыстар уобарастарынан кыттан, СӨ үтүөлээх артыыһа Борис Борисов, эдэр артыыс Александр Кириллин Сиэн Чолбодук хоһооннорун ааҕан тэрээһини олус киэргэттилэр. Судаарыстыбаннай уонна култуура диэйэтэлэ, уhулуччулаах режиссер, Ойуунускай аатынан Саха академическай тыйаатыр уус-уран салайааччыта, Олоҥхо тыйаатырын төрүттээччи, РФ норуодунай артыыһа, Андрей Саввич Борисов, Саха тыйаатырын уонна Иннокентий Аксентьевич чугас дьоно ыыппыт истиҥ тыллардаах эҕэрдэлэрэ ааҕылыннылар.

Саха сирин тыйаатырын ускуустубатыгар, литэрэтиирэтигэр дьоһун суолу-ииһи хаалларбыт Дмитриев И.А.-Сиэн Чолбодук аата Ньурба куоракка үйэтитилиннэ!