«Айыы сыдьаайдаах»
Иэйии имэҥин дьон сүрэҕэр
Өрүкүтэр аналгын
Өрө тутан күн сиригэр
Көстө түһэн ааспытыҥ.
Кырдьыгы көрдүү сатаан
Сулустарга суланарыҥ.
Хомуһуннаах тойуктаах
Кутурҕан Куо аатырарыҥ.
Хараастыылаах,харах уулаах
Хоһоонноруҥ хас тылыгар
Айыы сандал сыдьаайдаах
Ыралара сырдыыллар.
Ол -Үөһэттэн айдарыылаах
Талааныҥ кэрэһитэ.
Аньыыта суох дууһаҥ ыраас,
Амарах уйан этэ.
Ону саната эн ииҥҥэр
Ньургуһуннар тыллаллар.
Билбэт, эдэр көлүөнэҕэр
Ырыаҥ тыына салҕанар.
Моисей Ефимов

Сахаттан маҥнайгы поэтесса Варвара Николаевна Потапова баара буоллар бүгүн 75 сааһын туолуо этэ. Варвара Потапова ааҕааччыларыгар иккистээн төннүүтүгэр, тиллиитигэр поэтесса талаанын муҥура суох таптыыр, сүгүрүйэр Саха Өрөспүүбүлүкэтин норуодунай артыыһа Зоя Петровна Багынанова уонна РФ, Саха АССР үтүөлээх артыыһа Федот Федотович Потапов киллэрбит кылааттара сүҥкэн. «Мин сырдык санньыарым…» диэн ааттаан Варвара Потапова туһунан кинигэни сценарист Майя Власьевалыын, прозаик, тылбаасчыт, публицист Прокопий Чуукаардыын хомуйан таһаарбыттара.

Сүдү киһибит Варвара Потапова биир саамай, норуотугар бэлэх ууммут хоһооннорун хомуурунньуга «Үчүгэйиэн бу сиргэ» диэн кэрэ тыллардаах дьүһүйүүлэрэ ханнык баҕарар саха киһитигэр сүрэҕин ортотунан киирэр. Ньурба тыйаатырыгар поэтесса хоһооннорунан уус-уран дьүһүйүүлэр араас сылларга туруоруллубуттара. “Айар” национальнай кинигэ кыһата Варвара Потапова хоһооннорун Ньурба тыйаатырын артыыстара аахпыттарын аудиокинигэ оҥорон таһаарбыта.

СӨ үтүөлээх артыыһа Александра Кривогорницына «Көрсүөх ытыс тыаһынан!» ааптарскай араадьыйа биэриитин бүгүҥҥү таһаарыыта Варвара Потаповаҕа ананна. Тыйаатыр архыыбыгар баар СӨ суруйааччыларын сойууһун чилиэнэ, поэт, литературнай критик, сценарист Галина Томская-Айыына Чэгиэн 2009 c. Варвара Потаповаҕа анаан Ньурба тыйаатырын артыыстарын кытыннаран оҥорбут «Барыта баар хоһооҥҥо” радиоочерката бүгүн хатыланан таҕыста.

Ааспыт сыл сэтинньитигэр Варвара Потапова төрөөбүтэ 75 сылын көрсө режиссер Маргарита Васильева, артыыс Ньургун Михайлов бэлэмнээбит «Мин сибэкки буолбатахпын…» уус-уран дьүһүйүү премьерата буолбута. Бүгүн бу дьүһүйүү «Саха» НКИХ телевидениетыгар көрдөрүлүннэ.

Ньурба куоратын Ыраах Убайааныгар баар Варвара Потапова дьиэ — түмэлин уһаайбатыгар бүгүн Ф.Г. Сафронов аатынан Ньурбатааҕы кииннэммит библиотека үлэһиттэрэ Ноева М.Р., Васильева Р.П., Ньурбатаа5ы К.Д. Уткин -Нүһүлгэн аатынан «Норуоттар доҕордоһуулара” түмэл научнай -чинчийэр салаатын дириэктэри солбуйааччыта Борисов Б.Б. уонна “Ньурба уоттара” айар түмсүүтүттэн Федотова В.Д. тэрийиилэринэн саха бастакы поэтессатын бэлиэ күнүгэр анаммыт «Айар иэйии кыыма» литпикник буолла. Ньурба айар куттаахтарын айымньыларын кинигэҕэ штрихкодунан киллэрэн үйэтитии үлэтин Айталина Камилова ыыта сылдьар.

Ньурба тыйаатырыттан СӨ үтүөлээх артыыстара Людмила Васильева, Венера Никитина, эдэр артыыска Мария Мигалкина уонна литэрэтиирэ чааһын сэбиэдиссэйэ Мария Семенова тэрээһиҥҥэ сырыттылар. Мустубут дьон иннигэр тыйаатыр артыыскалара Варвара Потапова хоһооннорун иэйэн туран аахтылар, Ньурба бэйиэттэрин хоһооннорун ааҕан видеоҕа уһулуннулар. Тэрийээччилэр Степан Федотов онус кинигэтин билиһиннэрдилэр, «Ньурба уоттара» айар түмсүү билиҥҥи үлэтин сырдаттылар, баҕа санааларын тиэртилэр, кыттыбыт дьон истиҥник кэпсэтэн, санаа атастаһан астынан тарҕастылар.


Бу тэрээһин туһунан артыыска Мария Мигалкина санаатын тиэртэ:
«Ньурба сиригэр кэлиэхпиттэн олохтоох дьон-сэргэ сахалыы куттаахтарыттан, сахалыы саҥалаахтарыттан наһаа үөрбүтүм, чугастык ылыммытым. Ол иһин, бу буолбут Варвара Потаповаҕа аналлаах тэрээһин олус истиҥ-иһирэх буолуо диэн сэрэйбитим, эрдэттэн испэр долгуйа бэлэмнэммитим. Ийэм, РФ суруйааччыларын сойууһун чилиэнэ, Елизавета Мигалкина эмиэ Варвара Потапова курдук кутурҕан куттаах, илбистээх тыллаах, имэҥнээх этитиилээх хоһооннору суруйар буолан, Варвара айымньылара миэхэ наһаа чугас курдуктар. Онон, бу тэрээһиҥҥэ кини айымньытыттан бэйэм баҕаран туран, дьоҥҥо ааҕан иһитиннэрдим. Улуу киһи олох олорбут дьиэтигэр, тэлгэнэн олорбут тэлгэһэтигэр ытык сэргэтин тула хаампыт дьоллоохпуттан мин наһаа-наһаа үөрэбин. Олохпор биир умнуллубат түгэни бэлэхтээбиттэригэр, Ньурба улууһун «Ньурба уоттара» литератураны өрө тутааччылар, үйэтитээччилэр түмсүүлэригэр, коллегаларбар уонна бары тэрийээччилэргэ, ыалдьыттарга махталбын тиэрдиэхпин баҕарабын. Ньурба тыйаатырын кэлэктиибин аатыттан «Ньурба уоттара» түмсүү тэриллибитэ үйэ аҥардаах үбүлүөйүнэн эҕэрдэлиибит уонна саҥа кинигэ күн сирин көрөрүгэр баҕарабыт! Поэзия күөх хонуутугар хомоҕой хоһооннор хоһулла, ылбаҕай ырыалар ыллана турдуннар!»