Муус устар 12 күнүгэр, Иннокентий Аксентьевич Дмитриев-Сиэн Чолбодук төрөөбүт сиригэр Ньурбачааҥҥа саха театральнай ускуустубатыгар сүҥкэн кылаатын киллэрбит драматуур,тылбаасчыт,прозаик төрөөбүтэ 90 сылыгар анаан «Сиэн Чолбодук ньургуһуннаах кытыла» ахтыы түһүлгэтэ олорбут дьиэтин тиэргэнигэр буолан ааста. Ньурбачаан оскуолатын үөрэнээччилэрэ,нэһилиэк олохтоохторо кыттыылаах тэрээһини Ньурбачааннааҕы култуура дьиэтин специалиһа Алена Иудина иилээн-саҕалаан ыытта.

Ньурбачаан нэһилиэгин администрациятын баһылыга Семенова М.Н., библиотекарь Иванова Л.В. киирии тылларын,ахтыыларын кэннэ СӨ үтүөлээх артыыстара Александра Кривогорницына, Борис Борисов, эдэр артыыстар Александр Кириллин, Мария Мигалкина Сиэн Чолбодук хоһоонноруттан аахтылар.

Тыйаатыр литэрэтиирэҕэ чааһын сэбиэдиссэйэ Мария Семенова мустубут дьонно Ньурба тыйаатырыгар турбут тылбаастарын,пьесаларын билиһиннэрдэ. СӨ ускуустубатын үтүөлээх диэйэтэлэ Юрий Макаров Сиэн Чолбодугу кытта бииргэ үлэлээбит кэмнэрин, СӨ үтүөлээх артыыстара Александра Кривогорницына, Борис Борисов Сиэн Чолбодук айымньыларынан испэктээктэргэ оонньообут оруолларын аҕыннылар. Ахтыы түһүлгэтэ саха норуотун 100 бастыҥ ырыаларыгар киирбит Сиэн Чолбодук хоһоонугар «Ньургуһуннар» ырыанан түмүктэннэ.

Бу күн Дьокуускай куоракка  Былатыан Ойуунускай аатынан Саха тыйаатырыгар ахтыы түһүлгэтэ тэриллибитэ, оттон 18 чаастан «Хаарыан хампа күөх кытылым…» испэктээк оонньоммута.
Иннокентий Дмитриев – Сиэн Чолбодук олоҕун бүтүннүү тыйаатырга анаабыта. Кини 1962 сыллаахтан Саха тыйаатырыгар литературнай чаас сэбиэдиссэйинэн ананыаҕыттан, олоҕун тиһэх күнүгэр дылы — 2013 сыл ыам ыйын 16 күнүгэр дылы — тапталлаах Сахатын тыйаатырыгар үлэлээбитэ.
Бу тэрээһиҥҥэ Ньурба тыйаатырыттан СӨ норуодунай артыыһа Валентина Николаева кыттыбыта, Сиэн Чолбодук айымньыларынан,тылбастарынан Ньурба тыйаатырыгар турбут испэктээктэргэ оруолларын туһунан ахтыбыта.